Dysgwch sut i badlfyrddio (SUP) gyda gwers yn cyflwyno'r gamp

Mae Cymru’n wlad llawn llynnoedd ac afonydd hardd, ac o'i hamgylch mae milltiroedd o arfordir garw gyda morlynnoedd cudd ac ynysoedd. Beth yw'r ffordd orau i wneud y gorau o’r dyfroedd hyn? Rhwyfo a phadlo. Mae padlfyrddio, y gamp dŵr sydd yn tyfu gyflymaf yn y DU, yn hawdd i'w feistroli – ac efallai mai dyma'r ffordd berffaith o grwydro dyfroedd Cymru.

Mae SUP neu padlfyrddio’n golygu sefyll ar fwrdd mawr a defnyddio padl i symud yn eich blaen. Syml! Mae posib padlfyrddio ar afon neu lyn gwastad, sy’n eithaf hawdd i'w feistroli, neu fentro i donnau'r môr, sydd ychydig anoddach i’w feistrioli a lle defnyddir bwrdd llai.

Mae padlfyrddio’n gallu ymddangos yn gamp newydd, ac mae'n wir mai ond yn ddiweddar mae wedi dod yn boblogaidd yn y DU, gan ffrwydro mewn poblogrwydd yn y 2000au. Mae yna fwy nag erioed yn ei fwynhau erbyn heddiw (mae yna bellach dros 500,000 o badlfyrddwyr rheolaidd ym Mhrydain, a bu cynnydd, 15 gwaith yn fwy, mewn gwerthiant byrddau padlyrddio yn 2020). Ond mae sefyll ar fwrdd ar y dŵr yn rhywbeth llawer hŷn na hynny. Mae pobl Hawaii wedi bod yn padlfyrddio ers canrifoedd – Hoe He'e Nalu yw eu henw nhw ar y grefft.

Mae padlfyrddio’n hwyl, yn hawdd i ddechreuwyr roi tro arno am y tro cyntaf ac yn ffordd ecogyfeillgar o weld y wlad. Ac mae’n dda i chi hefyd. Mae padlo’n ymarfer cardio ac yn cryfhau cyhyrau'r breichiau, mae cadw cydbwysedd ar y bwrdd yn ymarfer cyhyrau craidd y corff, ac mae treulio amser yng nghanol byd natur yn rhyddhau endorffinau i'r ymennydd a hyd yn oed yn gallu lleihau straen a gorbryder.

Boed ar yr afonydd a'r llynnoedd a'r camlesi neu ar yr arfordir mae Cymru'n lle gwych i gamu ar fwrdd padlfyrddio. Trefnwch sesiwn gychwynnol gyda darparwr gweithgareddau wedi'i achredu – mae yna lawer iawn o sefydliadau padlfyrddio gwych yng Nghymru sy’n barod i fynd â chi i fannau hardd a hynny mewn ffordd ddiogel.

Mae Island SUP yn cynnal cyflwyniad 2 awr o hyd i badlfyrddio, ar ddyfroedd tawel Bae Jackson ar Ynys y Bari, yn ogystal â sesiynau i'r rhai sydd am wella eu sgiliau a dysgu troi ar y bwrdd a magu hyder ar y dŵr.

Mewn sesiwn padlfyrddio addas i ddechreuwyr bydd eich hyfforddwr yn eich cyflwyno i'r bwrdd ar ddŵr llonydd. Bydd yn dangos i chi sut i gario'ch bwrdd gan ddefnyddio'r handlen yn y canol a sut i glymu'r tennyn i'ch ffêr. Yna byddwch yn dysgu sut i fynd ar y bwrdd a phenlinio ar ei ganol – defnyddiwch yr handlen i'ch arwain a gosodwch eich pengliniau bob ochr iddi. Rhowch y padl yn y dŵr o'ch blaen ac yna’n ei dynnu’n ôl wrth ochr eich corff.

I sefyll, gosodwch gledrau eich dwylo i lawr o'ch blaen, codwch eich pengliniau oddi ar y bwrdd a sefyll i fyny'n araf, gan godi'ch padl wrth wneud hyn. I gadw'r bwrdd yn syth rhwyfwch ychydig o weithiau ar un ochr, ac yna ychydig o weithiau'r ochr arall. A dyna ni – rydych chi'n padlfyrddio!

Rhaid cofio rhai canllawiau diogelwch wrth ddysgu, dyna pam y dylai dechreuwyr bob amser fynd at ddarparwyr profiadol wedi'u hachredu i ddechrau. Bydd y rhain hefyd yn darparu offer i'ch cadw'n ddiogel – siwt wlyb a fest arnofio rhag ofn i chi ddisgyn i'r dŵr. Mae gan bob bwrdd padlo dennyn i'ch ffêr – felly os byddwch yn disgyn yn annisgwyl i'r dŵr (mae'n debygol o ddigwydd wrth i chi ddarganfod eich cydbwysedd, felly peidiwch â phoeni!), mae'n hawdd cael gafael ar y bwrdd a dringo’n ôl arno. Mae gan fyrddau addas ar gyfer tonnau'r môr dennyn syth fel arfer, tra bod gan y byrddau sy'n cael eu defnyddio ar ddŵr tawel dennyn siâp coil (dydy'r rhain ddim yn addas mewn tonnau oherwydd gallan nhw achosi i'r bwrdd lamu'n ôl).

Mae yna nifer o ddarparwyr gweithgareddau yn cynnig gwersi a theithiau. Mae Dŵr Cymru’n darparu gwersi mewn pedair cronfa ddŵr lle mae canolfannau gweithgareddau: Llyn Llys-y-frân yn Sir Benfro, Cronfa Ddŵr Llandegfedd ym Mynwy, Llyn Brenig yn Sir Ddinbych a Llanisien yng Nghaerdydd. Unwaith y byddwch chi wedi dysgu'r pethau sylfaenol, os ydych chi'n awyddus i ddatblygu'ch sgiliau a phrynu'ch offer, mae yna hefyd opsiwn i ddefnyddio’ch offer eich hun.

Ar gyfer padlo ar afon, mae Inspire2Adventure yn rhoi gwersi yn nyffryn hyfryd Afon Gwy, Sir Fynwy.

Mae cildraeth bychan a thywodlyd Bae Jackson, Y Barri yn fan gwych i’r rhai sy’n dechrau padlfyrddio am y tro cyntaf, gan ddysgu’r pethau sylfaenol dan oruchwyliaeth Island SUP.

Wedi i chi roi tro arni mae yna ddigonedd o lefydd gwych i badlfyrddio ar yr arfordir trawiadol neu ar ddyfroedd eraill hardd.

Mae darganfod yr awyr agored yn hwyl ac yn gyfle anhygoel am antur, ond cofiwch ddarllen am y peryglon a gwneud yn siŵr eich bod wedi paratoi. Cofiwch

• Fod â rhyw ffordd o alw am gymorth
• Gwisgo tennyn a chymorth arnofio
• Edrych ar ragolygon y tywydd ac amserodd y llanw
• Dilyn y canllawiau hyn gan yr RNLI er mwyn cadw'n ddiogel ar arfordir Cymru
• Gwneud yn siŵr eich bod wedi paratoi’n iawn ar gyfer eich diwrnod gan ddilyn cyngor AdventureSmart ar badlfyrddio’n ddiogel